"Okay, I understand," sagot naman nito. "Irerespeto ko kung ano ang sa tingin ko'y tama para sa iyo sa ngayon. Maghihintay ako kung kailan mo ako matutunang mahalin, ganoon kita kamahal Alana."
           "Maraming salamat at nauunawaan mo ako Henry." Tumango lang ito sa kanya nang bahagya at muling ipinagpatuloy ang pagmamaneho. Nakita niyang huminga ito ng malalim pero agad namang ngumiti. Ngiting nagpangiti rin agad sa kanya. Hinawakang muli nito ang isang kamay niya. Sinulyapan niya ang mainit na palad nitong nakahawak sa palad niya. At naamin niya sa sariling nagugustuhan na niya iyon at nararamdaman niyang hahanap-hanapin na niya iyon sa mga susunod na araw.